Að minnsta kosti sex manns létust í gær þegar Kamerún og Kómoreyjar mættust í sextán liða úrslitum Afríkukeppninnar í knattspyrnu en keppnin fer fram í Kamerún. Fólkið lést þegar fjöldi fólks reyndi að þröngva sér inn á leikvanginn en flestir þeirra voru ekki með miða á leikinn.

Talsmaður Messassi sjúkrahússins, sem er ekki fjarri leikvanginum sagði AP fréttastofunni að minnst 40 hafi slasast og margir þeirra alvarlega.

Naseri Paul Biya, ríkisstjóri, sagði að reikna megi með að dánartalan muni hækka.

Leikurinn fór fram á Olembe leikvanginum í höfuðborginni Yaounde en hann tekur 60.000 áhorfendur. Vegna heimsfaraldurs kórónuveirunnar mátti aðeins nýta 80% af hámarksgetu leikvangsins.