Óvíst er hver mun bera fyrirliðaband Íslands gegn Rúmeníu í undankeppni HM á morgun, Arnar Þór Viðarsson og Eiður Smári funduðu með eldri leikmönnum liðsins í gær.

Aron Einar Gunnarsson er fjarverandi eftir að hafa greinst með COVID-19 veiruna og Gylfi Þór Sigurðsson sætir rannsóknar í Bretlandi vegna brota. Hafa þeir iðulega séð um þá ábyrgð sem fylgir fyrirliðabandinu.

„Eiður og ég ræddum við okkar reyndustu leikmenn í dag. Við erum búnir að taka ákvörðun fyrir næstu þrjá leikina,“ sagði Arnar.

Kári Árnason, Jóhann Berg Guðmundsson, Birkir Bjarnason, Birkir Már Sævarsson, Hannes Þór Halldórsson og fleiri flokkast undir reyndari leikmenn.

„Við lítum á þetta þannig að við erum með nokkra fyrirliða hjá okkur. Margir mjög reyndir leikmenn, við treystum á þá alla. Taka og halda utan um ungan hóp.“

„Halda utan um þá leikmenn sem eru ekki með mikla eða enga reynslu. Svo kemur í ljós hver er með bandið fyrir hvern og einn leik. Það er ólíklegt að það verði sami maður með bandið í öllum leikjum.“