Faðir Þórhildar Gyðu Arnarsdóttur hafði beðið Guðna Bergsson fyrrum formann KSÍ um að ræða mál hennar aldrei opinberlega. Tölvupóstur þess efnis barst Guðna frá föðurnum. Þetta staðfestir Borghildur Sigurðardóttir varaformaður KSÍ í samtali við DV.

Guðni Bergsson sagði upp störfum sem formaður KSÍ í kjölfar þess hvernig hann og KSÍ brugðust við ásökunum um kynferðisbrot landsliðsmanna.

Maraþonfundir fóru fram í Laugardalnum um helgina þar sem stjórn sambandsins fundaði.

Allt starfsfólk sambandsins var boðað til fundar eftir að Guðni tók ákvörðun um að stíga til hliðar. Íslenska karlalandsliðið er á leið í verkefni en liðið á þrjá heimaleiki á næstu dögum, málið mun án nokkurs vafa fá mikla athygli í undirbúningi fyrir leikina.

Þórhildur Gyða Arnardóttir steig fram í fréttum RÚV á föstudag og greindi frá því að árið 2017 hafi þekktur landsliðsmaður áreitt hana kynferðislega og ráðist svo á hana, og sagði að Guðni og KSÍ hafi verið vel kunnugt um málið.

Rannsókn málsins gekk hægt og endaði faðir Þórhildar á því að senda stjórnarmeðlimum KSÍ tölvupóst og tilkynnti þeim um kæruna. Fékk hann þá svör frá Guðna Bergs sem sagðist taka málinu alvarlega. Guðni hafi svo sett sig í samband við foreldra Þórhildar og tilkynnt þeim að málið myndi hafa afleiðingar fyrir gerandann.

Umræddur landsliðsmaður greiddi Þórhildi bætur vegna málsins. Á Vísi kemur fram að Þórhildur hafi fengið nokkrar milljónir í sinn vasa í miskabætur. Þá flaug önnur kona erlendis með Þórhildi þar sem þær hittu umræddan landsliðsmann í knattspyrnu. Hann baðst afsökunar og borgaði þeim miskabætur vegna málsins.

Guðni Bergsson og Klara Bjartmarz framkvæmdarstjóri KSÍ höfðu tæklað  málið fyrir hönd sambandsins ef marka má orð Borghildar á Vísir.is í gær. „Þau ákváðu að vinna með málið. Þau töldu sig bundin ákveðnum trúnaði til að fara ekki með það lengra. Fólk verður líka að átta sig á að þetta eru afskaplega erfið og flókin mál. Þarf að ríkja trúnaður í svona málum. Við erum bara í þeirri stöðu sem ég held að allt samfélagið sé í núna. Við vitum ekki hvernig á að bregðast við og hvað á að gera,“ sagði Borghildur sem mun ásamt Gísla Gíslasyni stýra formennsku í KSÍ eftir að Guðni lét af störfum.

Borghildur segir við Vísi að þolandinn, í þessu tilfelli Þórhildur og faðir hennar hafi farið fram á að trúnað yrði haldið í málinu. Því má áætla að Guðni hafi ekki viljað tjá sig opinberlega um málið af fyrra bragði. „Já, það var óskað eftir því að Guðni (Bergsson) héldi trúnaði í því. Það allavega var svoleiðis. Það var talið að þetta mál hefði verið leyst í öðrum farvegi,““ sagði Borghildur við Vísir og staðfestir við DV að um sé að ræða mál Þórhildar.

„Það var að hálfu þolanda,“ sagði Borghildur um beiðnina um að KSÍ myndi ekki tjá sig ekki um málið.