Tveimur leikjum er nýlokið í 10. umferð Pepsi Max-deildar karla.

Breiðablik vann í skemmtilegum Kópavogsslag

HK og Breiðablik mættust í Kórnum þar sem þeir síðarnefndu unnu.

Arnþór Ari Atlason kom HK yfir um miðjan fyrri hálfleik. Kristinn Steindórsson jafnaði fyrir gestina skömmu fyrir leikhlé. Staðan í hálfleik var 1-1.

Heimamenn fengu víti þegar 20 mínútur lifðu leiks. Á punktinn fór Birnir Snær Ingason og skoraði.

Útlitið var gott fyrir HK en á 84. mínútu fékk Breiðablik víti. Úr því skoraði Thomas Mikkelsen og jafnaði leikinn.

Skömmu síðar höfðu Blikar snúið leiknum við. Andri Rafn Yeoman skoraði þá frábært mark. Lokatölur 2-3.

Breiðablik er í öðru sæti deildarinnar með 19 stig, 5 stigum á eftir toppliði Vals. HK er í ellefta sæti, fallsæti, með 6 stig.

Jafnt á Hlíðarenda

Valur og Fylkir gerðu jafntefli á Hlíðarenda.

Markalaust var eftir fremur rólegan fyrri hálfleik.

Eftir tíu mínútur af þeim seinni skoraði Haukur Páll Sigurðsson með skalla og kom heimamönnum yfir.

Fylkismenn sýndu mikinn karakter og fundu jöfnunarmark á 89. mínútu. Markið skoraði Arnór Borg Guðjohnsen. Lokatölur 1-1.

Valur er enn á toppi deildarinnar, nú með 24 stig. Fylkir er í sjöunda sæti með 11 stig.