Rétt í þessu lauk tveimur leikjum í Pepsi-Max deild karla. Breiðablik vann FH stórt og Keflavík hafði betur gegn Leikni.
Leikurinn fór rólega af stað en Blikar stjórnuðu ferðinni. Kristinn Steindórs kom Blikum yfir á 19. mínútu og Jason Daði tvöfaldaði forystuna stuttu síðar með frábæru marki.
Viktor Karl Einarsson skoraði þriðja mark heimamanna undir lok fyrri hálfleiks eftir frábært spil. Árni Vilhjálmsson bætti loks við fjórða og síðasta marki Blika á 58. mínútu úr vítaspyrnu. Öruggur sigur Blika því staðreynd en FH hefur aðeins fengið 1 stig úr síðustu 5 leikjum.
Blikar fara í 4. sætið með 16 stig en FH er í 6. sæti með 11 stig.
Breiðablik 4 – 0 FH
1-0 Kristinn Steindórsson (´19)
2-0 Jason Daði Svanþórsson (´23)
3-0 Viktor Karl Einarsson (´45)
4-0 Árni Vilhjálmsson (´58)
Keflavík tók á móti Leikni í sannkölluðum nýliðaslag. Leiknum lauk með 1-0 sigri heimamanna í Keflavík.
Keflavík byrjaði leikinn af hörku og komst strax yfir með marki frá Joey Gibbs á 6. mínútu. Þetta var fjórði leikurinn í röð sem Joey Gibbs skoraði. Markið kom eftir hornspyrnu.
Gestirnir stjórnuðu leiknum að mestu en illa gekk hjá Leiknismönnum að ógna. Ekki komu fleiri mörk í leikinn og 1-0 sigur Keflavíkur staðreynd
Með sigrinum fór Keflavík upp í 9. sæti deildarinnar en Leiknir er í 10. sæti
Keflavík 1 – 0 Leiknir
1-0 Joey Gibbs (´6)
