Valur, FH, Afturelding og Selfoss eru komin í 8-liða úrslit Mjólkurbikars kvenna eftir sigur á andstæðingum sínum í 16-liða úrslitunum í kvöld.
Valur rúllaði yfir Völsung á Húsavík
Sólveig Jóhannesdóttir Larsen kom Val yfir á 16. mínútu á Húsavík. Hún var svo aftur á ferðinni nokkrum mínutum síðar með öðru mark. Fanndís Friðriksdóttir, Mist Edvardsdóttir og Elín Metta Jensen áttu þá eftir að bæta við mörkum fyrir hálfleik. Ásdís Karen Halldórsdóttir skoraði svo sjötta og sjöunda mark Vals. Það fyrra á 48. mínútu og það seinna stundarfjórðungi síðar. Lokatölur 0-7.
Selfoss sló KR út í Vesturbænum
Brenna Lovera kom Selfyssingum yfir í Vesturbæ eftir tæpan stundarfjórðung. Hólmfríður Magnúsdóttir skoraði annað mark þeirra eftir rúman klukkutíma leik. Brynja Líf Jónsdóttir skoraði svo þriðja mark gestanna í lok leiks. Lokatölur 0-3.
Afturelding vann í Grindavík
Bæði mörk Aftureldingar í 0-2 sigri á Grindavík komu í seinni hálfleik. Það fyrra skoraði Sara Lissy Chontosh þegar rúmar 20 mínútur lifðu leiks. Það seinna gerði Ragna Guðrún Guðmundsdóttir svo í blálokin.
FH áfram eftir vítaspyrnukeppni
Elísa Lana Sigurjónsdóttir kom FH yfir gegn Þór/KA snemma leiks. Arna Sif Ásgrímsdóttir jafnaði fyrir gestina frá Akureyri eftir klukkutíma leik. Það var jafnt eftir venjulegan leiktíma og framlengingu. FH vann svo í vítaspyrnukeppni.
