Leiknir Reykjavík tók á móti Breiðabliki í Breiðholtið í kvöld. Leiknum lauk 3-3 eftir að heimamenn höfðu komist tveimur mörkum yfir.

Thomas Mikkelsen kom Blikum yfir um miðjan fyrri hálfleik með skalla eftir hornspyrnu. Það leit út fyrir að gestirnir ætluðu með forystu inn í leikhlé en undir lok fyrri hálfleiks skoraði Máni Austmann Hilmarsson með frábæru skoti fyrir utan teig.

Hálfleikstölur voru 1-1.

Eftir tíu mínútur í seinni hálfleik kom Emil Berger Leiknismönnum yfir. Þá vann hann boltann af varnarmanni Blika og skoraði svo með því að vippa yfir Anton Ara Einarsson í marki Blika.

Tíu mínútum síðar fengu heimamenn víti. Dómari leiksins mat það þá sem svo að Róbert Orri Þorkelsson hafi brotið á Sævari Atla Magnússyni innan teigs. Sævar Atli tók vítið sjálfur og skoraði af öryggi.

Þær voru ekki margar mínúturnar sem liðu áður en Jason Daði Svanþórsson hafði minnkað muninn fyrir Blika. Hann skoraði þá úr þröngu færi. Boltinn fór af Guy Smit, markverði Leiknis, og í markið.

Það var svo í blálokin sem gestirnir frá Kópavogi jöfnuðu leikinn. Skalli Thomas Mikkelsen var þá varinn af Smit en frákastið barst á Jason Daða sem skoraði. Grátlegt fyrir Leikni. Lokatölur 3-3.

Leiknir er með 2 stig eftir jafnmarga leiki. Breiðablik er með 1 stig, einnig eftir tvo leiki.