Íslenskur knattspyrnumaður er grunaður um stórfelldan þjófnað og er málið til rannsóknar hjá lögreglu. Manninum er gefið að sök að hafa rænt heildverslun með úr á höfuðborgarsvæðinu og tekið verðmæti fyrir fleiri milljónir. DV hafði samband við lögreglu sem gat staðfest að málið væri til rannsóknar.

Knattspyrnumaðurinn sem er á þrítugsaldri lék á annan tug leikja í Pepsi Max deild karla síðasta sumar. Leikmaðurinn hefur leikið fyrir nokkur félög hér á landi og oftar en ekki staðið sig vel.

Lögreglu tókst að hafa upp á umræddum leikmanni eftir að myndir náðust af bifreið sem hann notaði í ráninu. Umræddur bíll var skráður á félagið sem hann leikur með og þannig kom málið á borð þeirra.

„Höldur á bílinn, félagið leigði bílinn, maðurinn var með bílinn í sinni umsjón,“ sagði framkvæmdastjóri knattspyrnudeildar félagsins í samtali við DV í dag.

Leikmaðurinn er þessa dagana að leita sér hjálpar við vandamálum sem hafa elt hann síðustu mánuði. „Við erum búnir að taka þessa bifreið af honum,“ sagði framkvæmdastjórinn.

Ekki er búið að taka ákvörðun hvort félagið rifti samningi leikmannsins en félagið ætlar að styðja hann í bataferli sínu. „Meginatriðið er að menn langar til að aðstoða fólk. Þetta snýst ekki bara um „hardcore“ íþróttir heldur eru þetta líka vinir og félagar.“

Framkvæmdastjórinn segir málið á borði lögreglunnar og að hann viti ekki hvernig málin standi. „Lögreglan er að leysa úr því. Ég þekki ekki málavexti.“