Greint er frá því í La Gazzetta dello Sport í dag að Albert Guðmundsson og Gabriel Gudmundsson, séu báðir á radarnum hjá Maurizio Sarri, knattspyrnustjóa ítalska úrvalsdeildarfélagsins Lazio.
Taka skal fram að Gabriel Gudmundsson er ekki íslenskur, hann er sænskur bakvörður sem spilar með franska liðinu Lille. Gudmundsson nafnið er fjölskyldunafn í fjölskyldu Gabriels. Faðir hans er Niklas Gudmundsson, fyrrum leikmaður sænska landsliðsins og Blackburn Rovers.
Albert Guðmundsson er hins vegar landsmönnum vel kunnugur en frammistöður hans með hollenska liðinu AZ Alkmaar að undanförnu hafa varpað á hann kastljósinu.
Samkvæmt frétt La Gazzetta dello Sport hafa forráðamenn Lazio athugað möguleikan á því að fá Guðmundssyni til liðs við félagið í janúar þegar að félagsskiptaglugginn opnar.
Albert hefur verið orðaður við brottför frá AZ Alkmaar undanfarnar vikur og mögulegir áfangastaðir hans hafa meðal ananrs verið taldir skosku liðin Rangers og Celtic.
Albert gekk til liðs við AZ í ágúst árið 2018 frá PSV Eindhoven. Hjá AZ hefur hann spilað 95 leiki, skorað 24 mörk og gefið 10 stoðsendingar.
