Eggert Gunnþór Jónsson leikmaður FH er sá aðili sem er sakaður um að hafa nauðgað konu árið 2010 í Kaupmannahöfn. Stundin segir frá þessu. Nafn Eggerts hafði ekki komið fram áður.

Aron Einar Gunnarsson fyrirliði Íslands er sá sem hafði verið nafngreindur í málinu. Sakar íslensk kona Eggert og Aron Einar um að hafa nauðgað sér í Kaupmannahöfn árið 2010.

Aron Einar hefur hafnað sök í málinu en greint hefur verið frá því að Eggert og Aron Einar muni gefa skýrslu hjá lögreglu í nóvember.

Viðar Halldórsson formaður FH segir að hann viti af málinu og að hann sé í samskiptum við bæði lögmenn Eggerts og Arons.

„Hver segir að það sé lögreglurannsókn í gangi? Í fyrsta lagi veit hvorki þú né ég hvort þessir menn hafi verið kærðir, enda áhöld um hvort búið sé að kæra. Það skulum við fyrst hafa á hreinu,“ segir Viðar við Stundina.

Viðar var staddur í Kaupmannahöfn á þessum tíma en íslenska landsliðið hafði þá leikið gegn Danmörku. Sat Viðar í landsliðsnefnd. Af orðum hans að dæma hafnar Eggert allri sök í málinu. „Við sem vorum þar heyrðum aldrei af þessu máli, aldrei. Það sjá allir að ellefu ára gamalt mál … ég ætla ekki að segja að hún sé að ljúga,“ segir hann og heldur áfram. Ég ætla heldur ekki að segja að Eggert Gunnþór eða Aron Einar séu að ljúga. Ég get það ekki. Ég var ekki þarna. Ég var í Kaupmannahöfn, en ég var ekki á staðnum,“,“ segir Viðar við Stundina