EM í fótbolta hefst 11. júní næstkomandi en Ísland er ekki meðal þátttakenda eftir tap gegn Ungverjalandi í umspilsleik.
Úkraína komst inn á mótið en treyja þeirra hefur vakið mikla athygli, þá sérstaklega í Rússlandi en Rússar eru alls ekki sáttir með treyjuna. BBC greinir frá.
Á treyjunni má sjá kort af Úkraínu og eru svæði á kortinu sem Rússar segja að tilheyri sér, til dæmis Krímskagi. Einnig má finna slagorð sem hrópuð voru í mótmælum gegn Viktor Yanukovych, fyrrum forseta Úkraínu, en hann var mikill vinur Rússlands.
Rússar hernumu Krímskaga árið 2014 í kjölfar byltingar í Úkraínu. Innrásin er sögð brjóta verulega marga friðarsamninga sem löndin eru bæði hluti af. Sameinuðu Þjóðirnar viðurkenna ekki Krímskaga sem hluti af Rússlandi.
Þingmenn Rússlands hafa talað opinberlega gegn treyjunni og segir einn að hún sé mjög óviðeigandi. Talsmaður utanríkisráðuneytis Rússa segir kortið vera blekkingu.
