Copa America verður haldið  í Brasilíu þetta árið en keppnin hefst 13. júní. Keppnin átti upprunalega að fara fram í Argentínu og Kólumbíu. Alls taka 10 lið frá Suður-Ameríku þátt í keppninni.

Fyrir rúmri viku síðan hætti Kólumbía við að halda kepnnina og á mánudag varð ljóst að Argentína gæti ekki haldið keppnina vegna mikillar aukningar á Covid-19 smitum. Þá upphófst mikil ringulreið um hvaða land gæti haldið kepnnina og var tilkynnt í dag að Brasilía hefði orðið fyrir valinu.

Þetta vekur mikla athygli þar sem staðan er alveg jafn slæm í Brasilíu. Rúmlega 450 þúsund manns hafa látist úr Covid-19 í landinu og fer smitum verulega fjölgandi.

Brasilía hélt mótið síðast árið 2019. Ekki hefur verið ákveðið í hvaða borgum eða á hvaða völlum verður spilað þetta árið.

Mikil óánægja er meðal stuðningsmanna og leikmanna með það að mótið fari fram á meðan faraldurinn er svona slæmur í Suður-Ameríku. Luis Suarez sagði við blaðamenn á föstudag:

„Við verðum að setja heilsu okkar fram yfir fótboltann.“

Skipuleggjendur mótsins vilja þó alls ekki slaufa mótinu vegna þess hve miklum tekjum það skilar. Tekjurnar frá síðasta Copa America voru rúmlega 83 milljónir punda.