Þátttaka Kevin De Bruyne á EM er í hættu eftir meiðsli sem kappinn hlaut í úrslitaleik Meistaradeildar Evrópu sem fór fram í gærkvöldi.

De Brunye þurfti að fara út af eftir um það bil klukkutíma leik eftir að hafa lent saman við Anthony Rudiger en sá síðarnefndi fékk gult spjald fyrir atvikið.

De Bruyne staðfesti á Twitter í dag að hann hafi hlotið nefbrot ásamt broti í augntóttarbotni.

Fyrsti leikur Belgíu fer fram 12. júní gegn Rússlandi en eins og staðan er núna er óvíst hvort að leikmaðurinn verði búinn að jafna sig í tæka tíð. Heimildarmenn nálægt De Bruyne segjast þó vissir um að hann spili, jafnvel þótt hann verði með grímu.

Roberto Martinez, þjálfari Belgíu, fannst brotið glannalegt hjá Rudiger og hefði viljað sjá hann fá rautt spjald fyrir:

„Mér finnst Rudiger mjög, mjög heppinn,“ sagði Martinez í viðtali eftir leik.

„Hausarnir skella ekki saman heldur færir Rudiger öxlina að Kevin.“

„Fyrir mér var þetta kærulaust og hefði átt að vera rautt spjald.“