Manchester United ætlar ekki að borga 120 milljónir punda fyrir Harry Kane í sumar. Félagið ætlar frekar að leggja allt í sölurnar við að fá Jadon Sancho til félagsins og bíða svo í eitt ár og reyna að landa Erling Braut Haaland frá Borussia Dortmund sem getur verið framherji liðsins til lengri tíma segir í frétt Daily Mail.

Solskjaer byrjaði strax að vinna í næsta tímabili United eftir tapið gegn Villareal í úrslitaleik Evrópudeildarinnar.

Edinson Cavani skrifaði nýlega undir framlengingu á samningi sínum við Manchester United og er því ekki talið forgangsatriði að semja við hreinræktaðan framherja í sumar og reyna frekar að ná í Sancho.

Sancho hefur verið frábær fyrir Dortmund og hjálpaði liðinu í ár við að vinna þýska bikarinn og tryggja liðinu Meistaradeildarsæti. Þá skoraði hann 10 mörk í síðustu 15 leikjum.

Kane hefur sagt Tottenham frá því að hann vilji fara frá félaginu til þess að vinna titla. Leikmaðurinn á ennþá 3 ár eftir af samningi við liðið og vill United ekki fara í harða baráttu um framherjann við Manchester City þar sem framherji er ekki aðalmarkmiðið í sumar.

Solskjaer ætlar sér svo að nýta árið til þess að sannfæra Haaland um að koma til United næsta sumar. Haaland hóf feril sinn hjá Molde þar sem Solskjaer var einmitt þjálfari liðsins og þekkjast þeir félagar því vel.