Í kvöld fóru fram þrír leikir í 6. umferð Pepsi-Max deildar karla. KR tók á móti HK, FH sótti Leikni heim og þá tók Víkingur á móti Fylki.

KR 1 – 1 HK
1-0 Atli Sigurjónsson (´21)
1-1 Stefan Ljubicic (´84)

KR tók á móti HK á Meistaravöllum. KR hefur átt í erfiðleikum með HK í síðustu leikjum og það breyttist ekki í kvöld. HK byrjaði leikinn af krafti en þegar leikurinn róaðist tók KR yfir. Atli Sigurjónsson kom heimamönnum yfir á 21. mínútu með glæsilegu skoti utan af hægri kanti eftir frábæra pressu Kjartans Henry.

Stefan Ljubicic jafnaði metin þegar fimm mínútur voru eftir af venjulegum leiktíma og náði HK þar með að sækja stig úr leiknum.

Leiknir 2 – 1 FH
0-1 Matthías Vilhjálmsson (´21)
1-1 Sævar Atli Magnússon (´22)
2-1 Sævar Atli Magnússon (´58)

Leiknir tók á móti FH á Domusnova vellinum. FH var meira með boltann og stjórnaði leiknum en Leiknismenn sóttu hratt og ógnuðu þannig. Matti Vill braut ísinn á 21. mínútu eftir stoðsendingu frá Steven Lennon. Það stóð ekki lengi en Sævar Atli jafnaði strax eftir flotta skyndisókn heimamanna.

Eftir tæplega klukkutíma leik þá fékk Leiknir víti sem Sævar Atli skoraði örugglega úr. Þar við sat og sigur Leiknis staðreynd.

Víkingur 2 – 2 Fylkir
0-1 Djair Parfitt-Williams (´43)
1-1 Nikolaj Hansen (´81)
2-1 Helgi Guðjónsson (´86)
2-2 Nikulás Val Gunnarsson (´89)

Víkingar byrjuðu leikinn af krafti en Fylkir skoraði fyrsta mark leiksins á markamínútunni frægu og var það Djair sem skoraði það mark. Víkingar sóttu stíft í seinni og uppskáru á 81. mínútu þegar Nikolaj Hansen kom boltanum í netið. Aðeins fimm mínútum síðar kom Helgi Víkingum yfir og allt stefndi í heimasigur.

Fjórum mínútum síðar jafnaði Nikulás fyrir Fylki með skalla eftir frábæra fyrirgjöf Birkis. Ótrúlegar lokamínútur í skemmilegum leik sem endaði með 2-2 jafntefli.