Eins og kom fram í gær þá mátti Sölvi Snær Guðbjargarson ekki spila með Breiðabliki gegn Stjörnunni í Pepsi Max-deildinni í gær vegna Klásúlu í kaupsamningi leikmannsins sem liðin gerðu með sér. Málið var rætt í hlaðvarpsþættinum Dr. Football. Þar voru menn sammála um það að ákvæðið væri fáránlegt.
,,Ég finn ekki til með Blikum eða neitt slíkt en ég finn til með stráknum. Hann er búinn að ganga til liðs við Breiðablik. Hann er ekkert þarna á láni eða neitt,“ sagði Hjörvar Hafliðason, þáttastjórnandi.
Arnari Sveini Geirssyni, formanni leikmannasamtaka Íslands og gestur í þættinum, fannst galið að hafa slíkt ákvæði í kaupsamningnum.
,,Þetta er náttúrulega bara fáránlegt. Liðin verða bara að hætta þessu. Þau verða að hætta að setja einhverja svona klásúlur af því að þetta er ekki partur af einhverjum KSÍ-samning. Leyfðu manninum manninum að spila. Þú ætlar ekki að nota hann eða þá gerir ekki nægilega mikið til þess að halda honum í þínu liði. Sýndu honum þá það respect, þá virðingu að leyfa honum að spila leikinn.“
Hjörvar sagði að ákvæðið hafa aðallega bitnað á leikmanninum sjálfum sem þarf að fá að spila.
,,Mér finnst bara vera eitt fórnarlamb í þessu og það er Sölvi Snær. Nú er 20% af mótinu búið og hann er ekki búinn að spila neitt.“
Kristján Óli Sigurðsson tók í svipaðan streng. Hann telur að þetta gæti gert Sölva erfiðara fyrir að koma sér í liðið hjá Blikum.
,,Nú vinnur Breiðablik 4-0. Næsti leikur er á móti Skaganum, sem að reyndar unnu í kvöld. Ég geri samt kröfu á að Breiðablik fari upp á Skipaskaga og nái í þrjá punkta. Ef allt er eðlilegt er Óskar ekki að fara að breyta liðinu mikið fyrir leikinn á móti Skaganum. Hvað þá ef að þeir vinna hann.“
,,Hann færist bara lengra frá liðinu, aftar í röðina,“ bætti Hjörvar við að lokum.
