Í gærkvöldi kom það í ljós að Harry Kane hafi tilkynnt Tottenham að hann vilji fara annað í sumar. Stjórn Tottenham er sögð vera brjáluð yfir tímasetningu kappans en nú er lokavikan í ensku deildinni að hefjast og liðið á enn eftir að tryggja sér Evrópusæti.

Liðið gaf í dag út stutta yfirlýsingu um málið.

„Við einbeitum okkur að því að klára tímabilið eins vel og hægt er. Allir ættu að vera einbeittir að því markmiði,“ sagði í stuttri yfirlýsingu félagsins í frétt Evening Standard.

Aðdáendur halda að Tottenham sé með þessu að tala sérstaklega til Harry Kane og biðja hann um að einbeita sér að síðustu tveimur leikjunum gegn Aston Villa og Leicester en Tottenham vonast eftir úrslitum úr þeim leikjum til þess að ná Evrópusæti.

Þá er stjórn Tottenham einnig pirruð á því að Ryan Mason, sem er tímabundinn stjóri félagsins, þurfi að svara fyrir fréttirnar um Harry Kane og það taki fókusinn af mikilvægu leikjunum framundan.

Nokkur lið eru sögð vera í baráttunni um Kane en hann vill sjálfur vera áfram í ensku úrvalsdeildinni. Helstu liðin sem berjast um kappann eru Manchester United, Manchester City og Chelsea.