Það eru læti í herbúðum kvennaliðs Manchester en fjórir leikmenn vilja losna frá félaginu og fylgja þar með þjálfara félagsins. Ástæðan er slæmur aðbúnaður sem kvennaliðið býr við. Casey Stoney sagði starfi sínu lausu sem þjálfari kvennaliðs Manchester United en ástæðan er sú að félagið hefur lagt lítinn í metnað að í að bæta aðstöðuna sem kvennaliðið notar.

United leitar nú að nýjum þjálfara en Stoney er ósátt með það hvernig félagið hefur dregið lappirnar og kemur fram við liðið. Kvennaliðið hefur síðustu mánuði æft á Carrington æfingasvæðinu þar sem karlaliðið æfir einnig. Stelpurnar nota hins vegar ekki bygginguna sem karlaliðið notar.

Fyrstu mánuðina eftir að liðið byrjaði að æfa á Carrington svæðinu var ekki í boði fyrir stelpurnar að fara í sturtu eftir æfingar, nú er búið að setja upp gáma þar sem hægt er að fara í sturtu. Stelpurnar fengu svo völl til að æfa en hann er eins langt frá húsinu og hægt er að hugsa sér, um tíu mínútna gangur er á æfingavöllinn. Stoney og leikmenn hafa kvartað undan því enda er langt að skreppa á klósettið ef þess þarf.

Líkamsrækt fyrir leikmenn kvennaliðsins var einnig sett upp en um var að ræða stórt tjald, við þetta var þjálfarinn ósáttur. Stelpurnar vory fyrst um sinn á Leigh æfingasvæðinu sem U23 ára lið United notar í leikjum sínum, stelpurnar kröfðust þess að yfirgefa svæðið. Völlurinn var slæmur og meiðsli voru tíð.

Leikmenn og þjálfarar kvennaliðs United eru ósáttir og þá sérstaklega þegar þær bera sig saman við Manchester City. Þar er allt gert fyrir kvennalið félagsins og fá þær alla sömu aðstöðu og karlalið félagsins.

Leikmenn eru sammála Stoney og vilja fá betri aðstöðu hjá félaginu, fjórir lykilmenn samkvæmt enskum blöðum hafa fengið nóg og vilja burt.