Breiðablik festi í vikunni kaup á leikmanni frá Stjörnunni, Sölvi Snær Guðbjargarson gekk þá í raðir félagsins. Sölvi lék sinn fyrsta leik fyrir Breiðablik í gær þegar liðið vann Keflavík.

Breiðablik sem er með vel mannað lið var til umræður í Dr. Football hlaðvarpsþættinum í dag og þeirri spurningu kastað fram hvort Breiðablik væri með dýrasta lið landsins í dag.

Kaupverðið á Sölva frá Stjörnunni er sagt lítið sem ekkert. „Hann kostaði bara eitthvað klink, eftir stendur er Breiðablik með stærsta budgetið í deildinni?,“ sagði Hjörvar Hafliðason stjórnandi þáttarins.

Kristján Óli Sigurðsson sérfræðingur þáttarins segir svo ekki vera. „Valur er með langstærsta, FH er með stærra en Breiðablik,“ sagði Kristján.

Hjörvar taldi þá upp nokkra leikmenn sem hann telur að þéni vel í Kópavoginum. „Þetta eru margir launaháir leikmenn, þú ert með Anton Ara, Damir, Finn Orra, Gísla Eyjólfs, Höskuld, Kidda Steindórs, Oliver, Viktor Karl, Thomas Mikkelsen á svimandi háum launum, Árna Vill. Þetta er enginn smá launapakki.“