Sir Alex Ferguson fyrrum stjóri Manchester United áttar sig ekki á því hvers vegna knattspyrnustjórar í dag eru oftar en ekki að skrifa hluti niður á blað á meðan leik stendur.

Jose Mourinho, Brendan Rodgers og fleiri sjást iðulega með pennann á lofti þegar eitthvað gerist í leikjum þeirra liða sem þeir stjórna. Rafa Benitez varð frægur fyrir þetta þegar hann var stjóri Liverpool.

„Sem stjóri þá treysti ég alltaf á minnið mig, þú sérð leiki í dag þar sem stjórar eru skrifandi stóran hluta af leiknum. Þetta gerði ég aldrei,“ sagði Ferguson sem er einn besti og merkilegasti þjálfari í sögu fótboltans.

Ferguson segir að minnið hans hafi verið hans sterkasta vopn. „Ég hef alltaf treyst á minnið mitt, ég fór inn í klefann til leikmanna og þá var það sterkt vopn fyrir mig.“

„Ég bara skil ekki stjóra sem sitja og skrifa niður punkta allan leikinn, þú ert að skrifa og missir kannski af marki.“

Ferguson ákvað að hætta árið 2013 en mætir á flesta leiki Manchester United, þá á hann sæti í stjórn félagsins.