Spænska úrvalsdeildin, La Liga, rannsakar nú hádegisverð sem Lionel Messi hélt fyrir liðsfélaga sína fyrr í vikunni.

Í Katalóníu eru harðar sóttvarnarreglur í gangi og mega aðeins sex manns hittast á sama tíma.

Messi bauð liðsfélögum sínum í hádegismat í stórfenglegu húsi sínu í gær til að auka samheldni og undirbúa liðið fyrir mikilvægan leik um helgina gegn Atlético Madrid sem gæti ráðið úrslitum í deildinni.

Goal staðfestir að margir leikmenn hafi mætt með eiginkonur sínar í hádegisverðinn þar sem setið var á nokkrum borðum úti og er nú verið að rannsaka hvort að leikmennirnir hafi brotið sóttvarnarlög.

Ekki er ennþá ljóst hver refsingin verður fyrir leikmennina eða hvort þeim verði yfir höfuð refsað fyrir atvikið. Í maí brutu fjórir leikmenn Sevilla sóttvarnarlög og þá sagði Javier Tebas, forseti La Liga, að þeim yrði refsað harkalega. Þá sendu þeir frá sér afsökunarbeiðni og málið var fellt niður. Fjölmiðlar á Spáni vilja meina að svo verði ekki gert í þessu tilviki.