Gary Neville sérfræðingur Sky Sports fær á baukinn frá Simon Jordan sérfræðingi Talksport og fyrrum eiganda Crystal Palace. Mikil mótmæli stuðningsmanna Manchester United fyrir utan heimavöll liðsins, Old Trafford í fyrradag, urðu til þess að leik United og Liverpool í ensku úrvalsdeildinni var frestað.

Mikill fjöldi stuðningsmanna Manchester United safnaðist saman og ruddi sér leið inn á völlinn, braut og bramlaði, með fyrrgreindum afleiðingum. Ástæða mótmælanna var sú að stuðningsmennirnir vilja að Glazer-fjölskyldan, eigendur Manchester United, selji félagið.

Neville hefur talað um að mótmælin væru eðlilegur hlutur en Jordan segir það langt í frá. „Það er að byggjast upp meðbyr með þessu, sérfræðingar og fjölmiðlamenn hafa tjáð sig með mjög óábyrgum hætti,“ sagði Jordan.

„Mér gæti ekki verið meira sama um hvort fólk sé sammála því sem Gary Neville segir, að styðja svona ofbeldi og segja að þetta sé eðlileg hegðun er ekki í lagi.“

Jordan segir aldrei hægt að verja það þegar ráðist er á fólk. „Það er aldrei í lagi að ráðast á lögregluþjóna, það er aldrei í lagi að brjótast inn á knattspyrnuvöll, að klifra upp á mörkin og brjóta allt og bramla.“

„Þú getur ekki réttlætt þetta af því að þér er illa við hvernig félagið þitt er rekið. Það er verið að reyna að réttlæta þetta. Þeir eru að reyna að réttlæta hluti sem eru ekki í lagi.“