Unglingur í Singapúr hefur verið ákærður fyrir það að hafa sent morðhótanir til Neal Maupay, framherja Brighton í ensku úrvalsdeildinni.

Derek Ng De Ren er sá sem hefur verið ákærður og hann er 19 ára gamall. Derek hafði samband við Maupay í nokkur skipti í gegnum samfélagsmiðilinn Instagram á síðasta ári á tímabilin júní/júli, skömmu eftir 2-1 sigur Brighton gegn Arsenal í ensku úrvalsdeildinni.

Í leiknum lenti Maupay í samstuði við Bernd Leno, markvörð Arsenal með þeim afleiðingum að Leno þurfti að yfirgefa völlinn á sjúkrabörum. Maupay skoraði síðan sigurmark leiksins í uppbótartíma.

Nokkrum dögum eftir leikinn fékk Maupay fyrstu skilaboðin frá Derek þar sem hann hótaði fjölskyldu hans.

„Heldurðu að þú getur sloppið með það að meiða Leno? Ekki séns í hélvíti. En ekki hafa áhyggjur þú ert öruggur. Það er meiri skemmtun fólgin í því að vita til þess að þú finnir sársauka á meðan að ástvinir þínir þjást,“ voru fyrstu skilaboðin sem Maupay fékk frá Derek.

Tveimur dögum seinna sendi Derek önnur skilaboð.

„Það verður ráðist á fjölskyldu þína seinna í dag, fylgstu með,“ stóð í þeim skilaboðum.

Það er á þessum tímapunkti sem Maupay lætur lögreglu vita af skilaboðunum og sendir inn kvörtun til Instagram. Þá fékk hann önnur skilaboð frá Derek.

„Heldurðu að með því að kvarta undan mér sértu öruggur? Ég mun drepa þig og fjölskyldu þína,“ stóð í þeim skilaboðum.

Enska úrvalsdeildin stendur á bak við Maupay í málaferlinu en mikil vitundarvakning hefur verið undanfarið gagnvart þeirri áreitni og hatri sem leikmenn verða fyrir á samfélagsmiðlum.