Everton er nýjasta liðið til þess að blanda sér í baráttuna um Sergio Aguero, framherja Manchester City sem getur farið frítt frá félaginu eftir leiktíðina.
Everton mun ekki ná að bjóða Aguero 240.000 pund á viku líkt og hann fær hjá Manchester City en það er vilji forráðamanna félagsins að veita honum stórar upphæðir ef hann krotar undir samning hjá félaginu, svokallaða undirskriftar bónusa (e. signing-on fee).
Auk Everton hafa nokkur af stærstu knattspyrnufélögum áhuga á kappanum, Chelsea, Tottenham, Barcelona og Inter Milan eru á meðal þeirra liða.
Aguero er markahæsti leikmaðurinn í sögu Manchester City en hann gekk til liðs við félagið í júlí árið 2011. Hjá Manchester City hefur hann leikið 386 leiki, skorað 258 mörk og gefið 73 stoðsendingar.
Hann hefur orðið Englandsmeistari í fjórgang og er við það að bæta við fimmta titlinum á þessu tímabili.
