Sjónvarpsþáttur 433 verður á dagskrá Hringbrautar og á vefnum klukkan 21:30 í kvöld. Gestur þáttarins verður Heimir Guðjónsson þjálfari Vals.

Efsta deild karla fer af stað á föstudag en Valur hefur titil að verja. Í síðari hluta þáttarins kemur Benedikt Bóas Hinriksson og teiknar upp þrjár sögur fyrir sumarið.

Heimir ræðir í viðtalinu um það sem fram undan er í sumar en flestir sérfræðingar telja að Valur verði meistari og telja það í raun skandal ef svo verður ekki.

„Ég reikna með því að okkur verði spáð efsta sætinu, 2019 endaði Valur í sjötta sæti svo kemur tímabilið 2020 og allir spá Val fyrsta sætinu,“ segir Heimir í viðtalinu en hann er á leið inn í sitt annað tímabil sem þjálfari Vals.

Heimir botnaði ekkert í því að Val væri spáð titlinum í fyrra. „Ég skildi ekkert í því, núna er 2021 og ég reikna með því að Val verði spáð titlinum.“

Sérfræðingar lásu rétt í spilin á síðustu leiktíð og Heimir hafði þetta að segja. „Þið eruð klókari en þið lítið út fyrir að vera.“

Þátturinn er á dagskrá eins og fyrr segir 21:30 í kvöld.