Daniel Kristoffersson einn virtasti sérfræðingur í sænskum fótbolta skrifar ítarlega grein um Kolbein Sigþórsson í Expressen.
Kolbeinn Sigþórsson, var í banastuði með liði sínu IFK Gautaborg er liðið vann 2-0 sigur á AIK í sænsku úrvalsdeildinni í gær. Kolbeinn var í byrjunarliði Gautaborgar og skoraði bæði mörk liðsins á 3. og 38. mínútu.
Kolbeinn og AIK komust að samkomulagi um að rifta samningi hans við félagið undir lok síðasta árs, eftir tvö erfið tímabil. Stuðningsmenn AIK kenna þeim sem stjórna félaginu um hvernig fór.
„Þetta snerist allt um Kolbein Sigþórsson, hver hefði trúað því að hann ætti fyrirsagnirnar eftir tíma hans hjá AIK. Þar skoraði hann ekki eitt deildarmark og var yfirleitt meiddur,“ skrifar Daniel Kristoffersson.
„Eftir leikinn virðist það vera að stjórnarmenn Gautaborgar og læknir liðsins hafi vitað hvað þeir voru að gera þegar þeir gerðu samning við Kolbein. Læknirinn gaf grænt ljós á kaupin á þessum 31 árs gamla framherja.“
Daniel Kristoffersson segir að kvöldið í gær hafi verið sýning. „Þetta var Kolbeins Sigþórssonar sýningin, hann skoraði eftir þrjár mínútur og gabbaði þar varnarlínu AIK. Hann hélt þeim uppteknum með hlaupum en líka með því að vinna nánast öll einvígi.“
Hann segir mikilvægt fyrir Gautaborg að Kolbeinn haldist heill. „Það verður mikil vinna hjá lækni félagsins að halda honum heilum heilsu.“
„Meiðslasaga hans var ein ástæða þess að hann kom inn á þessum samningi til Gautaborgar, hann fær borgað fyrir leiki og frammistöðu. Þeir borga honum aðeins lítið brot af því sem AIK gerði í föst laun. Gautaborg gerði því frábæran samning við Kolbein.“
„Enginn skynsamur maður hefði tekið Kolbein, hann hafði gengið í gegnum mjög erfiða tíma. AIK getur ekki fengið gagnrýni fyrir það en það má hrósa Gautaborg fyrir að þora að trúa á hann.“
