Dortmund tók á móti Bremen í 29. umferð þýsku Bundesligunnar í dag. Leiknum lauk með 4-1 sigri Dortmund sem tryggir sér með því þrjú lífsnauðsynleg stig í baráttunni um Meistaradeildarsæti.
Rashica kom Bremen yfir þegar stundarfjórðungur var búinn af leiknum. Um 15 mínútum seinna jafnaði Reyna metin fyrir Dortmund. Þá var komið að norska undrabarninu Erling Braut Haaland. Hann kom heimamönnum yfir úr vítaspyrnu á 34. mínútu og bætti öðru við fjórum mínútum síðar. Selassie varð fyrir því óláni að skora sjálfsmark undir lok leiks og gulltryggði þar með sigur Dortmund.
Dortmund er nú í 5. sæti deildarinnar með 49 stig, fjórum stigum á eftir Frankfurt í 4. sætinu. Bremen siglir lignan sjó í 13. sæti deildarinnar
Dortmund 4 – 1 Bremen
0-1 Rashica (´14)
1-1 Reyna (´29)
2-1 Haaland (´34)
3-1 Haaland (´38)
4-1 Selassie (´87)
