Svo gæti farið að fjórða sæti ensku úrvalsdeildarinnar muni ekki gefa sæti í Meistaradeild Evrópu á næsta tímabili. Til þess þarf að vísu mikið að gerast. Það má þó velta hugsanlegum uppákomum fyrir sér.

Ef allt er eðlilegt fara fjögur efstu lið deildarinnar í Meistaradeildina, eins og þekkst hefur lengi. Á þessum tímapunkti er það þó enn mögulegt að svo verði ekki.

Til þess að liðið sem endar í fjórða sæti deildarinnar í ár fari í Evrópudeildina í stað Meistaradeildarinnar þurfa tvö ensk lið að sigra báðar Evrópukeppnirnar nú í vor. Í þokkabót þyrfti báðum liðum að mistakast það að ná topp fjórum í ensku úrvalsdeildinni.

Manchester City og Chelsea eru fulltrúar Englands í undanúrslitum Meistaradeildarinnar sem fram fara síðar í mánuðinum. Arsenal og Manchester United eru ensku liðin í undanúrslitum Evrópudeildarinnar.

Manchester-liðin eru svo gott sem örugg með sitt sæti í Meistaradeildinni að ári vegna stöðu sinnar í deildinni heima.

Það skilur okkur eftir með Lundúnaliðin, Arsenal og Chelsea. Bláliðar eru í hörku Meistaradeildarbaráttu við Liverpool, Leicester, West Ham, Tottenham og Everton. Verði þeir undir í þeirri baráttu en vinna Meistaradeildina í vor þá fara þeir einfaldlega í keppnina á næsta tímabili ásamt þeim fjórum liðum sem enda efst í deildinni.

Ef að Arsenal, sem er í níunda sæti ensku úrvalsdeildarinnar, vinnur hins vegar Evrópudeildina í þokkabót þá fara bæði Arsenal og Chelsea í Meistaradeildina á næsta tímabili. Það myndi þýða að einungis þrjú lið fengju sæti í keppninni í gegnum ensku úrvalsdeildina.

Chelsea mæti Real Madrid í undanúrslitum Meistaradeildarinnar á meðan Arsenal mætir Villareal á sama stigi Evrópudeildarinnar.