Gylfi Þór Sigurðsson skoraði tvö mörk fyrir Everton í 2-2 jafntefli gegn gömlu félögum sínum í Tottenham í kvöld. Leikið var á Goodison Park, heimavelli Everton.

Tottenham komst yfir með marki frá Harry Kane á 27.mínútu. Michael Keane, varnarmaður Everton, gerði þá mistök er hann skallaði fyrirgjöf beint á Kane sem skoraði. Gestirnir höfðu lítið sem ekkert ógnað marki andstæðinganna fram að þessu.

Heimamenn fengu þó víti örfáum mínútum eftir mark Kane. Þá braut Sergio Reguilon á James Rodriguez er sá síðarnefni reyndi að koma sér í skotstöðu.

Gylfi Þór skoraði örugglega úr vítinu, sendi Hugo Lloris í rangt horn í markinu.

Everton var betri aðilinn í fyrri hálfleik en staðan var 1-1 þegar liðin gengu til búningsklefa.

Seinni hálfleikur fór fjöruglega af stað og fengu bæði lið sín færi. Á 62.mínútu leiksins var aftur komið að Gylfa Þór. Hann afgreiddi boltann þá listilega í mark gestanna eftir mjög flotta sókn Everton. Staðan orðin 2-1.

Það liðu þó aðeins rúmar 5 mínútur áður en Harry Kane jafnaði leikinn fyrir Tottenham. Keane gerði sig þá aftur sekan um mistök í vörninni er hann átti misheppnaða tilraun til að hreinsa frá marki. Hann skallaði boltann beint í Mason Holgate áður en boltinn rataði til Kane.

Hvorugu liðinu tókst að finna sigurmarkið og lokatölur því 2-2. Everton geta verið svekktir með að hafa ekki unnið leikinn þar sem bæði mörk Tottenham komu eftir mistök í vörninni.

Everton er í áttunda sæti, 5 stigum frá Chelsea sem er í fjórða sæti. Tottenham er í sætinu fyrir ofan með 1 stigi meira en Everton. Þeir hafa þó leikið einum leik meira.