Zlatan Ibrahimovic gæti þurft að setja skó sína á hilluna á næstunni ef FIFA mun krefjast þess að hann verði dæmdur í leikbann. Sænskir miðlar segja að Zlatan gæti átt yfir höfði sér þriggja ára leikbann.

Zlatan braut reglur FIFA þegar hann snéri aftur í sænska landsliðið, ástæðan er sú að Zlatan er hluthafi í veðmálafyrirtækinu Bethard. Zlatan snéri aftur í sænska landsliðið í síðasta mánuði en hann hafði ekki leikið fyrir Svíþjóð í sex ár, hann vill taka þátt í Evrópumótinu í sumar. Zlatan verður fertugur á þessu ári.

„Við höfum ekki rætt málið við Zlatan,“ sagði Håkan Sjöstrand hjá sænska knattspyrnusambandinu.

Samkvæmt reglum FIFA má sá sem tekur þátt í keppnum hjá knattspyrnusambandinu ekki hafa neinn fjárhagslegan ávinning í gegnum veðmálafyrirtæki.

Bethard hefur staðfest að Zlatan eigi hlut í fyrirtækinu en hann hefur verið andlit veðbankans eftir að hann gerðist hluthafi.