Starfsmenn Manchester United hafa verið að breyta Old Trafford heimavelli félagsins síðustu daga, ástæðan er sú að leikmenn höfðu kvartað undan rauða litnum í stúkunni.

Í rúmt ár hafa engir áhorfendur komið á Old Trafford, United eins og önnur félög hafa því notað stúkurnar í að senda skilaboð og auglýsa.

Rauði liturinn sem United hefur notað í sætin hafa haft truflandi áhrif á leikmenn, gengi United á heimavelli hefur ekki verið eins gott og á útivelli.

„Þetta ætti ekki að vera ástæða en leikmenn hafa nefnt þetta, að þegar þú ert að taka ákvörðun á sekúndu að sjá liðsfélaga, að það sé rauð treyja, rauður bakgrunnur og rauð sæti,“ sagði Solskjær.

„Við höfum því reynt að breyta þessu með skilaboðum sem styðja baráttu gegn rasisma, það var mikilvægt að hafa þetta ekki eins rautt og það hefur verið.“