Þórólfur Guðnason sóttvarnalæknir virðist ekki vera sáttur með þá breytingu sem gerð var á tillögum hans er varðar takmarkanir og regluverk í kringum heimsfaraldurinn. Í gær var það kynnt að áhorfendur á íþróttaleikjum yrðu bannaðir en á sama tíma átti að leyfa áhorfendur í sal á leiksýningum. Þetta var beint upp úr tillögum Þórólfs.

Skömmu síðar ákvað heilbrigðisráðherra að breyta reglugerðinni og leyfa áhofrendur á kappleikjum, þvert á tillögur Þórólfs að hans sögn.

„Ég lagði til að áhorfendur yrðu ekki leyfðir á íþróttaviðburðum en ráðherra gerði það. Það er ekkert við því að segja finnst mér,“ sagði Þórólfur um málið við RÚV.

Ósamræmið í því að leyfa áhorfendur á leiksýningum en ekki kappleikjum sætti gagnrýni. Þórólfur virðist í samtali við RÚV hafa miklar áhyggjur af stöðunni hér á landi vegna COVID19, þrátt fyrir að aðeins örfá smit hafi greinst hér á landi síðustu vikur.

„Fólk þarf að passa sig. Þetta stendur og fellur með því hvað við sem einstaklingar gerum. Að við reynum að forðast hópamyndanir sem mest jafnvel þótt mörkin séu 20. Það kunna þetta allir og það er það sem skiptir máli,“ segir Þórólfur við RÚV.