Forráðamenn Manchester United vonast eftir því að Real Madrid lækki verðmiða sinn á Rapahel Varane í sumar. Líkur eru á að franski varnarmaðurinn verði til sölu.
Varane sem er 27 ára gamall miðvörður er sagður á óskalista Manchester United, verðmiði Real Madrid er sagður vera í kringum 60 milljónir punda.
Real Madrid gæti hins vegar þurft að lækka þann verðmiða í sumar þegar Varane mun aðeins eiga ár eftir af samningi sínum. Real Madrid þarf að losa um fjármuni í sumar til að geta fengið inn nýja leikmenn.
Vitað er að Real Madrid leggur mikla áherslu á það að krækja í Kylian Mbappe frá PSG en til þess þarf félagið að selja leikmenn.
Ole Gunnar Solskjær vill fá inn varnarmann í sumar til að mynda par með Harry Maguire en Victor Lindelöf hefur verið í því hlutverki síðustu ár.
