Tveir leikir fóru fram í 8-liða úrslitum Meistaradeildar Evrópu í kvöld. Chelsea komst áfram í undanúrslit eftir samanlagðan sigur gegn Porto og Paris Saint-Germain sló út Evrópumeistara Bayern Munchen þrátt fyrir tap á heimavelli í kvöld.
Á Parc des Princes í París tóku heimamenn í Paris Saint-Germain á móti Bayern Munchen. Fyrri leikur liðanna fór fram á Allianz Arena í Þýskalandi og var æsispennandi. Paris Saint-Germain fór þar með 3-2 útisigur af hólmi.
Bayern Munchen vann leik kvöldsins með einu marki gegn engu. Eina mark leiksins skoraði fyrrum leikmaður Paris Saint-Germain, Chuopo-Moting á 40. mínútu.
Sigur Bayern Munchen í kvöld tryggði liðinu samt sem áður ekki sigur í einvíginu og sæti í undanúrslitum. Paris Saint-Germain fer áfram á fleiri skoruðum útivallarmörkum í einvíginu sem endaði með 3-3 jafntefli, Evrópumeistarar Bayern Munchen eru úr leik.
Á Ramón Sanchez Pizjuan vellinum í Sevilla á Spáni, mættust Chelsea og Porto. Fyrri leikur liðanna fór fram á sama velli og þá var Porto heimaliðið. Sá leikur endaði með 2-0 sigri Chelsea.
Leikur kvöldsins endaði með 1-0 sigri Porto. Eina mark leiksins skoraði Mehdi Taremi í uppbótartíma venjulegs leiktíma. Chelsea er samt sem áður komið áfram í undanúrslit með samanlögðum 2-1 sigri úr einvíginu.
