West Ham United tók á móti Leicester City í ensku úrvalsdeildinni í dag. Leiknum lauk með 3-2 sigri West Ham en leikið var á heimavelli liðsins, London Stadium.
Fyrsta mark leiksins leit dagsins ljós á 29. mínútu. Það skoraði Jesse Lingard, lánsmaðurinn frá Manchester United, eftir stoðsendingu frá Vladimir Coufal.
Lingard var síðan aftur á ferðinni á 44. mínútu er hann kláraði auðvelt færi eftir undirbúning frá Jarod Bowen. Staðan var því 2-0 fyrir Hamrana þegar flautað var til hálfleiks.
Þegar aðeins þrjár mínútur voru liðnar af seinni hálfleik bætti Jarrod Bowen við þriðja marki West Ham eftir stoðsendingu frá Tomas Soucek.
Kelechi Iheanacho, minnkaði muninn fyrir Leicester City með marki á 70. mínútu eftir stoðsendingu frá Ricardo Pereira.
Iheanacho var síðan aftur á ferðinni í uppbótartíma venjulegs leiktíma er hann bætti við öðru marki Leicester. Nær komust gestirnir hins vegar ekki.
Fleiri mörk voru ekki skoruð í leiknum og 3-2 sigur West Ham því staðreynd. Sigurinn er mikilvægur fyrir liðið sem er í harðri baráttu um Evrópusæti. West Ham situr í 4. sæti deildarinnar með 55 stig, einu stigi á eftir Leicester City sem vermir þriðja sæti deildarinnar.
