Dimitar Berbatov, fyrrum leikmaður Manchester United, Tottenham og fleiri liða, segir að Marcus Rashford muni bera höfuð og herðar yfir aðra leikmenn í heimsfótboltanum í framtíðinni, ásamt Erling Braut Haaland og Kylian Mbappe.

Þetta sagði Berbatov eftir að hafa séð leik Granada og Man Utd í Evrópudeildinni á fimmtudag. Rashford skoraði þar í 0-2 sigri.

,,Þú getur séð í marki hans gegn Granada að hann veit nákvæmlega hvert og hvenær hann á að taka hlaupið, hann átti frábæra snertingu og svo er hann fær um þessa frábæru afgreiðslu.“

Hann talaði einnig um þá miklu reynslu sem Rashford hefur nú þegar á hæsta stigi leiksins. Rashford hefur verið í aðalliði Man Utd í um fimm ár þrátt fyrir að vera aðeins 23 ára. Berbatov telur hann ekki síðri en Mbappe og Haaland þrátt fyrir að þeir séu oft fyrst nefndir í umræðunni um bestu ungu leikmenn heims.

,,Mbappe, Haaland og Rashford. Þetta eru leikmennirnir sem ég held að verði bestir í framtíðinni. Rashford verður alltaf á toppnum ef hann helst heill.“