Crystal Palace tók á móti Chelsea í síðasta leik dagsins í ensku úrvalsdeildinni. Gestirnir áttu ekki í neinum vandræðum með Palace og unnu mikilvægan sigur í baráttunni um Meistaradeildarsæti.
Chelsea-liðið var virkilega sannfærandi í fyrri hálfleik. Kai Havertz kom þeim yfir á 8.mínútu og var Christian Pulisic búinn að tvöfalda forystuna tveimur mínútum síðar. Kurt Zouma kom Chelsea svo í 3-0 eftir hálftíma leik.
Forysta gestanna hefði getað verið enn stærri þegar liðin gengu til búningsherbergja í hálfleik. Staðan í hálfleik þó 0-3.
Það var aðeins meiri kraftur í heimamönnum eftir hlé. Þeir minnkuðu muninn eftir rúman klukkutíma leik. Þar var að verki Christian Benteke. Hann skoraði með skalla eftir frábæra fyrirgjöf Jeffrey Schlupp.
Það var þó aldrei útlit fyrir að Palace tæki eitthvað úr þessum leik. Von þeirra um það varð svo endanlega úti þegar Pulisic skoraði sitt annað mark og það fjórða fyrir Chelsea.
Chelsea fékk færi til að bæta við en unnu að lokum þægilegan 1-4 sigur.
Chelsea fer með sigrinum upp fyrir West Ham og í fjórða sæti deildarinnar. Hamrarnir eiga þó eftir að leika í þessari umferð og geta endurheimt sætið með sigri gegn Leicester á morgun.
Palace er í 13.sæti með 38 stig. Þeir hafa að litlu að keppa og sigla hinn fræga ligna sjó.
