Edinson Cavani framherji Manchester United er óviss með það hvort hann eigi að framlengja dvöl sína á Englandi. Ole Gunnar Solskjær stjóri Manchester United segir frá þessu.

Cavani er á sínu fyrsta tímabili hjá United en það gæti orðið það síðasta. Eftir ágætis spretti í upphafi hefur dregið af Cavani.

Cavani lenti í þriggja leikja banni fyrir umdeilda færslu á samfélagsmiðlum, hann var ósáttur með það og hefur ekki náð vopnum sínum síðan.

„Ég hef rætt þetat við Edi, við höfum rætt þetta og hann er óviss með næsta tímabil,“ sagði Solskjær en Cavani er sagður vilja fara til Boca Juniors í Argentínu.

„Þetta hefur verið erfitt ár í öllum heiminum, hann vill tíma til að gera upp hug sinn. Ég er öruggur á því að við fáum góða útgáfu af Edinson út tímabilið. Það eru átta leikir eftir, hann hefur verið jákvæður hérna. Vonandi helst hann heil næstu sjö vikurnar.“