Rúrik Gíslason, fyrrverandi landsliðsmaður og atvinnumaður í knattspyrnu er að gera það gott í dansheiminum eftir að knattspyrnuskórnir fengu að fara á hilluna.

Rúrik er einn af keppendum Let’s dance, dansþáttaraðarinnar í Þýskalandi sem svipar til íslensku þáttanna Allir geta dansað.

Rúrik dansar þar með Renötu Lusin, atvinnudansara og hefur heldur betur verið að slá í gegn. Rúrik og Renata eru náin á sviði en það hefur búið til kjaftasögur í Þýskalandi, á forsíðum blaða þar í landi er reglulega fjallað um samband þeirra á sviðinu og ýjað að því að eitthvað meira gæti verið þar á bak við.

„Hvað segir konan mín? Það er á forsíðum á öllum blöðum hérna að ég sé að daðra við Renötu og að hún sé að daðra við mig, að ég sé að daðra við þessa og þessa. Síðast í gær var það á forsíðu á stóru blaði hérna að ég gæti ekki haldið höndunum frá Renötu,“ sagði Rúrik um málið í þættinum Brennslan á FM957.

Rúrik segir það tóma þvælu að eitthvað meira en bara fagmennska á sviði sé á milli hans og Renötu. „Ég get alveg sagt það með góðri samvisku, það er mjög skrýtið að þú ert að vinna með einhverjum í 8 tíma á dag en þetta er bara fagmennska. Maðurinn hennar Renötu er hérna líka og það er algjör toppmaður,“ sagði Rúrik og drap þannig í kjaftasögunum.

„Ég skil alveg að þetta lítur þetta þannig út í þáttunum, við verðum að láta það líta þannig út. Dans er bara leiksýning.“