Á morgun tekur Real Madrid á móti erkifjendum sínum í Barcelona í stórleik umferðarinnar í spænsku deildinni klukkan 19:00. Leikur liðanna, sem gjarnan er kallaður Él Clásico, hefur ekki þótt eins spennandi eftir að stjórstjarnan Cristiano Ronaldo yfirgaf Madrídarliðið og gekk til liðs við Juventus. Mikil spenna ríkir þó yfir leik morgundagsins en litlu munar á liðunum í deildinni. Barcelona er í 2. sæti deildarinnar með 65 stig, einu stigi á eftir Atlético en Real Madrid situr í 3. sæti, tveimur stigum á eftir Barcelona.

Spánarmeistarar Real Madrid verða án þó nokkurra lykilmanna á morgun en Eden Hazard, Sergio Ramos, Raphael Varane og Dani Carvajal verða allir fjarri góðu gamni. Þessu er öfugt farið hjá Barcelona en þar snúa tveir lykilmenn aftur í liðið, þeir Gerard Piqué og Sergei Roberto.

Dagblaðið Marca á Spáni heldur úti öflugri umfjöllun um leikinn og í dag var farið yfir hraða leikmanna liðanna. Leikmennirnir sem slógu í gegn og unnu mikilvæga sigra fyrir sín lið í vikunni, þeir Vinícius Jr. og Dembélé eru hraðastir samkvæmt gögnum Skillcorner. Þeir hafa tekið saman mesta hraða sem leikmenn liðanna hafa náð í síðustu 10 leikjum í deildinni. Vinícius er samkvæmt þessu hraðastur allra leikmanna liðanna en mældist hæst á 30,6 km hraða á klukkustund.

Þá virðist sóknarlína Madrídinga vera töluvert hraðari en hjá Börsungum en stóra spurningin er sú hvort það nægi til við að hjálpa vængbrotnum Madrídingum?