Mikel Arteta, stjóri Arsenal, gæti neyðst til að selja sinn besta leikmann á þessu tímabili, Bukayo Saka, í sumar ef liðið nær ekki Meistaradeildarsæti. Þá ku vera í forgangi hjá félaginu að semja varanlega við Martin Odegaard.

Saka hefur verið hreint út sagt frábær á þessu tímabili. Hann fékk traust frá Arteta snemma í stjórnartíð hans og verið lykilmaður síðan. Það er ljóst að mörg stórlið í Evrópu gætu hugsað sér að hafa Saka í sínum röðum. Það gæti því freistað Arsenal að selja hann fyrir háa fjárhæð til að endurbyggja liðið. Hluti af þeirri endurbyggingu yrði að semja endanlega við Odegaard sem hefur verið mjög öflugur á láni hjá Arsenal frá því að hann kom í janúar.

Von Arsenal um að ná Meistaradeildarsæti í gegnum ensku úrvalsdeildina er svo gott sem engin. Þeir hafa heilt yfir átt slakt tímabil þar, eru í 10.sæti með 42 stig þegar 8 leikir eru eftir. Eina leið liðsins inn í deild þeirra bestu myndi þá vera í gegnum Evrópudeildina. Með sigri í henni öðlast lið þátttökurétt í Meistaradeildinni og þar af leiðandi háar fjárhæðir sem fylgja því að spila þar. Arsenal er sem stendur komið í 8-liða úrslit Evrópudeildarinnar.

Ef þeim tekst ekki að vinna keppnina gætu þeir farið þá leið að selja Saka til að ná inn fjármagni.