Tveir leikmenn í enska boltanum hafa fengið niðrandi skilaboð vegna kynþáttar þeirra á samfélagsmiðlum um helgina. Báðir fengu þeir skilaboðin í kjölfar þess að hafa tekið þátt í leikjum með liðum sínum. Facebook hefur brugðist við.

Annar leikmaðurinn er Callum Robinson, sem skoraði tvö mörk fyrir WBA í 2-5 sigri gegn Chelsea í gær. Undir færslu á Instagram sem hann birti eftir leik skildi einn eftir apatákn (e.monkey emojis).

WBA tilkynnti þetta til lögreglu og sendi frá sér yfirlýsingu þar sem félagið fordæmir skilaboðin.

,,Það er sláandi að það að skora tvö mörk í knattspyrnuleik geti vakið upp svona viðbrögð,“ er meðal þess sem stendur í yfirlýsingunni.

Þá varð Jamal Lowe, leikmaður Swansea, einnig fyrir aðkasti af rasískum toga á Instagram eftir 1-0 tap gegn Birmingham á föstudagskvöld. Áðurnefnd apatákn voru einnig send á hann.

,,Það eru mörg fífl þarna úti,“ skrifaði Lowe á reikning sinn ásamt því að birta skilaboðin sem hann fékk.

Facebook, sem á Instagram, hefur eytt reikningnum sem notaður var til að skrifa skilaboðin til Lowe. Samfélagsmiðlar hafa verið hvattir til að taka harðar á kynþáttaníði á sínum miðlum undanfarið. Facebook sendir því jákvæð skilaboð með viðbrögðum sínum.