Sergio Aguero, leikmaður Manchester City, er staðráðinn í að spila áfram í ensku úrvalsdeildinni eftir að samningur hans við Manchester City rennur út í sumar. Ljóst er að hart verður barist um framherjann sem getur farið á frjálsri sölu frá Manchester City.

Aguero er markahæsti leikmaðurinn í sögu Manchester City, allt frá því að hann gekk til liðs við Manchester City árið 2011 hefur hann raðað inn mörkum. Meiðsli hafa haldið honum frá knattspyrnuvellinum stóran hluta af tímabilinu en ljóst er að ef Aguero getur haldið sér heilum, þá er það mikill styrkur fyrir hvaða lið sem er.

Ljóst er að lið utan Englands á borð við Real Madrid, Barcelona og Paris Saint-Germain, munu reyna að næla í kappann en hann hefur hug á að vera á fram í Englandi.

Árið 2011, áður en að Aguero gekk til liðs við Manchester City, hafði Chelsea áhuga á að fá hann til liðs við sig. Sá áhugi virðist enn til staðar en forráðamenn Chelsea leita leiða til að efla sóknarleik liðsins en framherjinn Timo Werner hefur ekki náð að sýna sitt besta eftir að hann kom til félagsins fyrir tímabilið.

Aguero myndi aldrei vilja eyðileggja það samband sem hann á við stuðningsmenn Manchester City með því að færa sig um set til Manchester United og Liverpool er ekki í leit að sóknarmanni, þeirra áherslur liggja í öftustu línu.