Það má vænta þess að það verði nóg að gera í komandi félagskiptaglugga hjá félagsliðum í sumar.
Það á einnig við um Manchester United en samkvæmt heimildum Mirror eru uppi hugmyndir um að endubyggja leikmannahóp liðsins og skapa leikmannahóp sem gæti gert atlögu að Englandsmeistaratitlinum á næsta tímabili.
Til þess að geta styrkt hópinn með þeim leikmönnum sem Solskjær telur að liðið þurfi til þess að vinna ensku úrvalsdeildina, þarf Manchester United að losa sig við nokkra leikmenn.
Edinson Cavani, Juan Mata, Sergio Romero og Lee Grant eru líklegast allir á förum en samningur þeirra við félagið rennur út í sumar.
Síðan eru sjö leikmenn í viðbót sem Mirror telur að gætu verið á leiðinni frá Old Trafford.
Tahith Chong – Mikið var ætlast af Chong á sínum tíma en hann hefur ekki staðið undir væntingum hingað til. Í ljósi þess hversu vel mannað, Manchester United er á köntunum virðist Chong vera á útleið.
Andreas Pereira – Hefur verið inn og út úr liðinu undanfarin ár. Hann spilaði 25 leiki í ensku úrvalsdeildinni á síðasta tímabili en hefur verið á láni hjá Lazio á þessu tímabili.
Jesse Lingard – Það verður áhugavert að sjá hvað verður um Jesse Lingard sem hefur heillað knattspyrnuáhugamenn síðan að hann fór á láni til West Ham þar sem hann hefur skorað fimm mörk í sjö leikjum. Frammistöður hans urðu til þess að hann var valinn í enska landsliðið á ný.
Diogo Dalot – Hefur verið á láni hjá AC Milan á tímabilinu, náði ekki að stimpla sig inn í byrjunarlið Manchester United á sínum tíma. Talið líklegra að Dalot yfirgefi Old Trafford.
Phil Jones – Kemur kannski mörgum á óvart en Phil Jones er ennþá leikmaður Manchester United. Hann hefur átt við meiðslavandræði að stríða en erfiðasta verkefni forráðamanna félagsins gæti verið að finna mögulega kaupendur fyrir Phil Jones.
Brandon Williams – Luke Shaw hefur eignað sér vinstri bakvarðastöðuna hjá Manchester United með frábærum frammistöðum. Williams hefur ekki náð að brjóta sér leið í liðið og ef Manchester United vill ekki selja þá mun félagið líklegast vilja senda hann út á láni.
Donny van de Beek – Gekk til liðs við Manchester United fyrir tímabilið á 40 milljónir punda frá Ajax. Hann hefur aðeins byrjað tvo leiki fyrir Manchester United í ensku úrvalsdeildinni á tímabilinu. Mun félagið reyna að ná því besta úr leikmanninum eða selja hann strax til að skapa rými fyrir nýja leikmenn?
