Jóhann Berg Guðmundsson, sneri aftur í byrjunarlið íslenska landsliðsins í 2-0 tapi gegn Armeníu í kvöld.

Jóhann telur að íslenska liðið hafi ekki átt skilið að sigra leikinn.

„Þú átt ekki að vinna neinn leik nema að þú eigir það skilið. Í fyrri hálfleik áttu þeir einhver skot fyrir utan teig, við vorum ágætlega mikið með boltann en vorum ekki að skapa okkur neitt.“ 

„Svo kemur þetta mark sem við komum vanalega í veg fyrir og frekar lélegt mark sem gefur þeim náttúrulega mikið sjálfstraust. Við fáum mjög gott færi til að jafna en leikurinn fer auðvitað 2-0 og þá er þetta ekki gott fyrir okkur, við vitum það alveg,“ sagði Jóhann Berg í samtali við RÚV.

Jóhann Berg vildi ekki segja til um hvort það þyrfti að bregðast við tapinu með róttækum hætti, breytingum.

„Það er undir þjálfurunum komið. Auðvitað er þetta ekki gott tap í kvöld. Við þykjumst vera lið sem á að vinna Armeníu á útivelli en það gerðist ekki í kvöld. Þetta var ekki nógu gott en það munar oft mjög litlu á milli í fótbolta og þetta datt með þeim í kvöld, við vitum að við getum gert miklu betur,“ sagði Jóhann Berg, leikmaður íslenska landsliðsins í samtali við RÚV.