Það vakti nokkra furðu að Mikael Neville Anderson miðjumaður FC Midtjylland var ekki í byrjunarliði U21 árs landsliðsins á fimmtudag. Mikael er í sterku liði í Danmörku og hefur átt nokkuð fast sæti í A-landsliðshópi Íslands.
Flökkusögur voru á kreiki um að Mikael væri lítillega meiddur en það var fjarri lagi. Rætt var um fjarveru Mikael í hlaðvarpsþætti Fótbolta.net í gær.
„Með fullri virðingu eru leikmenn úr Öster og Silkeborg að byrja inná í miðjunni í þessum U21 leik en ekki hann, ég skil það vel að honum finnist það furðulegt,“ sagði Haraldur Árni Hróðmarsson þjálfari hjá Val í hlaðvarpi Fótbolta.net.
Mikael hefur vakið nokkra athygli fyrir svör sín og skoðanir á samfélagsmiðlum síðustu vikur, Haraldur telur að Mikael þurfi hjálp á þeim vettvangi.
„Að því sögðu ætti hann að kaupa sér einhverja ráðgjöf með samfélagsmiðla. Þú þarft ekki að segja allt sem þú ert að hugsa. En þetta er gaman fyrir okkur sem fylgjumst með úr fjarlægð. Minn punktur er að frá hans sjónarhóli er hann kannski stærri stjarna en einhverjir aðrir þarna, en menn verða að haga sér,“ segir Haraldur.
View this post on Instagram
Mikael Neville mætti ekki í verkefni U21 árs liðsins í nóvember vegna verkefna með félagsliði. Magnús Már Einarsson, ritstjóri Fótbolta.net útilokar ekki að honum hafi verið refsað í slæmu tapi gegn Rússlandi á fimmtudag.
„Kannski er verið að refsa honum fyrir að gefa ekki kost á sér í U21 landsliðið í nóvember á meðan þeir sem byrjuðu voru á svæðinu. Kannski horfir Davíð þannig á hlutina að erfitt sé að taka hina út,“ segir Magnús Már Einarsson í Innkastinu á Fótbolta.net.
