Sara Sigmundsdóttir ein fremsta CrossFit stjarna í heimi hefur fengið boð um að stýra æfingum hjá Englandsmeisturum Liverpool í fótbolta. Viðræður og umræða þetta hafa átt sér stað um nokkurt skeið.

Sara sem nú glímir við meiðsli hefur verið í fremstu röð í nokkur ár en Snorri Barón, umboðsmaður hennar segir frá málinu.

„Það var þannig að styrktar- og þolþjálfarar þessara félaga eru alltaf með opinn huga fyrir því sem er að gerast í heiminum. Andreas Kornmayer, sem er styrktar- og þolþjálfari Liverpool, hafði samband við Heimi Hallgrímsson, fyrrum landsliðsþjálfara, og Heimir hringdi í mig,“ sagði Snorri í hlaðvarpsþættinum Steve Dagskrá en Fótbolti.net sagði fyrst frá.

Styrktarþjálfari Liverpool hefur mikinn áhuga á Crossfit. „Kornmayer er með brennandi CrossFit áhuga og hafði séð viðtal við Söru á CNN þar sem hún var að fara yfir batarferlið sitt úr meiðslum sem hún hafði verið að vinna sig í gegnum þá. Hann heillaðist af henni sem er mjög auðvelt að gera. ‘Það gæti verið gaman að henda handsprengju inn á æfingu hjá Liverpool á æfingum og fá einhverja CrossFitara til að hjálpa mér að drilla æfingarnar og setja þær upp,“ sagði Snorri.

Snorri Barón ræðir reglulega við Kornmayer og það er opið að Sara fari og verði með æfingar hjá Liverpool. „Ég spjallaði seinast við hann í gær og það er ekki búið að loka því neitt.“