Íslenska u-21 árs landsliðið hóf leik á Evrópumótinu í Ungverjalandi í kvöld gegn Rússlandi. Íslenska liðið átti erfitt uppdráttar í leiknum sem endaði með 4-1 sigri Rússlands.

Jafnræði var með liðinum framan af en á 30. mínútu braut Róbert Orri, á leikmanni Rússlands innan vítateigs og vítaspyrna dæmd.

Fedor Chalov tók spyrnuna fyrir Rússa og sendi Patrik í marki Íslands í rangt horn. Staðan því orðin 1-0 fyrir Rússland.

Rússar settu í annan gír eftir þetta mark og íslenska liðið átti engin svör. Á 42. mínútu bætti Nayair TIknizyan, við öðru marki Rússlands í leiknum eftir frábært spil rússneska liðsins.

Þremur mínútum síðar kom þriðja mark Rússa, rétt áður en dómari leiksins flautaði til hálfleiks. Markið skoraði Arsen Zakharyan en íslenska vörnin leit ekki vel út í aðdraganda marksins.

Denis Makarov bætti síðan við fjórða marki Rússlands á 53. mínútu og brekkan orðin ansi brött fyrir íslenska liðið.

Þeim tókst þó að minnka muninn. Á 59. mínútu átti Willum Þór Willumsson, snyrtilega sendingu inn fyrir vörn Rússlands, sendingin rataði á kollinn á Sveini Aron Guðjohnsen sem skallaði boltann í netið.

Fleiri mörk voru ekki skoruð í leiknum og íslenska liðið byrjar Evrópumótið á tapi. Næsti leikur liðsins er gegn Dönum á sunnudaginn næstkomandi.