„Það er raunhæft að fara áfram, algjörlega. Þessi riðill er mjög sterkur, Danmörk og Frakkar eru með mjög öflug lið og Rússland líka þar sem flestir eru í efstu deild þar í landi,“ sagði Stefán Teitur Þórðarson leikmaður U21 árs liðs Íslands við fjölmiðla í dag.

Íslenska liðið hefur hafið undirbúning fyrir lokamót EM að fullum krafi en liðið hefur leik á fimmtudag gegn Rússlandi, síðan taka við leikir við Frakkland og Danmörk.

Stefán á von á mikilli baráttu gegn Rússum sem eru þekktir fyrir að gefa ekki tommu eftir. „Sem lið eru þeir mjög vel skipulagðir, mikill agi í því sem þeir gera. Þeir fengu fjögur mörk á sig í undankeppninni, þeir skora mikið úr föstum leikatriðum eins og við sjálfir. Ég held að þetta varði slagsmál, svo ræðst þetta á föstum leikatriðum hugsa ég.“

Stefán Teitur gekk í raðir Silkeborg síðasta sumar eftir góða spretti með ÍA, hann hefur staðið sig vel í Danmörku en liðið berst um að komast upp í efstu deild. „Þetta er búið að vera mjög gott, við erum búnir að spila sex leiki og vinna sex eftir áramót. Patrik (Gunnarsson, markvörður) er búinn að standa sig mjög vel, við erum búnir að vera á góðu róli og förum þannig inn í þessa úrslitakeppni

Patrik Sigurður sem er með Stefáni í U21 árs liðsins kom á láni til félagsins í upphafi þess árs. „Hann kemur með mikla ró, hann hefur hjálpað okkur mikið. Við keyrum saman á allar æfingar, búum hlið við hlið nánast. Það hjálpar að tala íslensku og svona.“

Stefán telur sig hafa bætt leik sinn eftir að hafa yfirgefið ÍA og farið til Danmerkur. „„Mér finnst ég vera búin að taka mörg skref fram á við. Maður getur vonandi tekið fleiri skref á þessu móti hérna.“

Stefán var spurður að því hvort svindlarar væru í hópi íslenska liðsins þegar kemur að æfingum eða í spilum utan vallar. „Það er góð spurning, það er enginn sem svindlar í spilum. Það eru nokkrir sem svindla í reit á æfingum.“

„Menn eru bara að hafa gaman, menn að djóka á milli sín. Halda mönnum á tánum.“