David Beckham, einn af eigendum bandaríska liðsins Inter Miami, fullyrðir að Miami sér kjörinn staður fyrir knattspyrnuleikmenn til að búa á og stunda iðju sína.
Inter Miami er ungt félag en Beckham segist vera viss um að félagið geti laðað til sín yfirburðar knattspyrnumenn. Cristiano Ronaldo og Lionel Messi eru reglulega orðaðir við Inter Miami.
Nú þegar hafa leikmenn á borð við Gonzalo Higuain og Blaise Matuidi, sem hafa mikla reynslu af stærstu deildum Evrópu, spilað með liðinu.
„Þegar að við tilkynntum um stofnun Inter Miami, vissi ég að það myndu fara af stað sögusagnir um það hvaða leikmenn myndu ganga til liðs við félagið. Hvort það væri Ronaldo, Messi eða Neymar,“ sagði Beckham í viðtali við ESPN.
Það er mat Beckham að í Miami sé allt til alls fyrir leikmenn af hæsta gæðastigi.
„Þetta er frábær borg. Mér finnst við vera með flottan stuðningsmannahóp. Miami er borg sem togar í leikmenn sem hafa spilað í Evrópu og eru stórstjörnur,“ sagði David Beckham, einn af eigendum Inter Miami.
